Жаңалықтар

25 шілде 2006
Кеше Президент Нұрсұлтан Назарбаев Қауіпсіздік Кеңесінің арнаулы тобы мүшелерімен кеңес өткізді, онда сыбайлас жемқорлыққа қарсы күрес мәселелері талқыланды. Кеңеске сондай-ақ Бас прокурор Р.Түсіпбеков пен Ішкі істер министрі Б.Мұхамеджанов қатысты.
308.jpg

Сыбайлас жемқорлық арнасының кеңдігіне және бұл құбылыстың әлеуметтік қауіптілігіне байланысты Мемлекет басшысы арнаулы топқа аталған істерді ғана бақылаумен шектеліп қалмауды тапсырды.

 

Арнаулы топ жүргізіп отырған жұмыс сыбайлас жемқорлыққа қарсы тұру саласында мемлекеттік органдар мен жұртшылық қызметін айтарлықтай белсенді етуге мүмкіндік берді.

 

Қауіпсіздік Кеңесінің отырысынан кейін өткен  кезеңде құқық қорғау органдары мен арнаулы қызметтер сыбайлас жемқорлық фактілері бойынша тағы 135 қылмыстық іс қозғады (ҰҚК — 24, ЭСҚКА — 102, ІІМ — 9), тергеуге дейінгі тексеріс кезеңінде 20 материал бар (ҰҚК — 17, ЭСҚКА — 2, ІІМ —1).

 

Қарағанды облысында түрлі мемлекеттік органдардағы 16 лауазымды тұлғаның, Алматы, Қостанай облыстарында және Алматы қаласында — 11-ден, Шығыс Қазақстан облысында — 10, Астанада — 9, Ақтөбе және Батыс Қазақстан облыстарында — 8-ден, Атырау, Оңтүстік Қазақстан, Жамбыл және Павлодар облыстарында — 7-ден, Қызылорда және Солтүстік Қазақстан облыстарында — 6-дан және Маңғыстау облысында 5 лауазымды тұлғаның сыбайлас жемқорлық қылмысын жасауға қатыстылығы анықталды.

 

Түрлі деңгейдегі бірқатар әкімдерге, атап айтқанда, Ақтау қаласы әкімінің екі орынбасарына, Аягөз қаласының әкіміне, Батыс Қазақстан облысы Бөрлі ауданы әкімінің орынбасарына, Курчатов қаласы әкімінің орынбасарына, бірқатар ауылдық аймақтардың әкімдеріне қатысты сыбайлас жемқорлық белгілері бойынша қылмыстық іс қозғалды.

 

Тұтастай алғанда, әкімдерге және жергілікті атқарушы органдардың қызметкерлеріне қатысты — 56 қылмыстық іс, ішкі істер органдарының қызметкерлеріне қатысты — 18, қаржы полициясының қызметкерлеріне қатысты — 5, әділет органдарының қызметкерлеріне қатысты — 4, прокуратура органдарының қызметкерлеріне қатысты — 2, кедендік бақылау қызметкерлеріне қатысты — 2, Қорғаныс министрлігінің әскери қызметшілеріне қатысты — 3, салық органдары қызметшілеріне қатысты — 5, Жоғарғы Соттың Сот әкімшілігі жөніндегі комитетінің қызметшілеріне қатысты — 7, білім және ғылым  жүйесі қызметшілеріне қатысты — 7, денсаулық сақтау жүйесі қызметшілеріне қатысты — 4, орталық мемлекеттік органдардың, ұлттық компаниялар мен банктердің қызметшілеріне қатысты — 6, жеке меншік құрылымдардың басшыларына және жеке тұлғаларға қатысты 16 қылмыстық іс қозғалды.

 

Қызылорда облысында Ұлттық қауіпсіздік комитеті “ҚазТрансОйл” ұлттық компаниясының “Құмкөл-Қарақойын” магистральдық мұнай құбырынан және тікелей кен орнынан ұрланған мұнайды өңдеу жөніндегі 18 астыртын шағын зауытты жойды. Анықталған уақытша сақтау бекеттерінде 455 тонна мұнай, 118 тонна мұнай өнімі табылған. Алдын ала есептер бойынша, ай сайын осы зауыттар жалпы сомасы 1 млн. долларға жуық өнім өндірген.

 

Тұрғын үй құрылысы саласында заңнаманың бұзылу фактілері ерекше алаңдаушылық туғызады. Қаржы полициясы 6 айда осы салада 54, соның ішінде тек Астанада — 5 қылмыстық іс қозғады. Бұл ретте үлесшілер мен кредиттік ұйымдарға келтірілген залал 5,7 млрд. теңгені құрады, 511 үлесші залал шекті деп танылған.

 

Президент атап өткеніндей, мұндай экономикалық қылмыстарды сыбайласқан лауазымды тұл¬ғалар тарапынан жәрдем болмайынша жасау мүмкін емес. Бұл  соңғы уақытта сыбайлас жемқорлық байланыстардың, ең алдымен құқық қорғау және басқа билік органдарындағы сыбайлас байланыстардың көмегі арқылы жеке меншікті басып алу үшін белсенді түрде пайдаланылып жүрген, “рейдерлік” деп аталатынға да қатысты.

 

Бас прокуратураға, ҰҚК-ге, қаржы полициясына бұл істерді жан-жақты және объективті түрде тергеу, барлық кінәлі лауазымды адамдарды олардың дәрежесі мен жағдайына қарамастан анықтауға және жауапкершілікке тартуға тапсырма берілді.

 

Маусым айынан бастап Мемлекет басшысының атына және арнаулы топтың мекен-жайына күн сайын азаматтар мен заңды тұлғалардан өте көп шағымдар келіп түсуде. Барлығы 140-тан астам шағым түскен.

 

Негізінен ішкі істер органдары (36 өтініш), прокуратура органдары (21), қаржы полициясы (17) қызметкерлерінің заңсыз іс-әрекеттеріне шағымданған.

 

Қауіпсіздік Кеңесінің арнаулы тобына оларда баяндалған айрықша келеңсіз фактілерді бақылауға алу, ал нәтижелерін жүйелі түрде Пре¬зидентке баяндап отыру тапсырылды. Сөзбұйдалық пен өтініштерге жүрдім-бардым қараушылықтың әр оқиғасы бойынша тексеру жүргізіліп, кінәлілер жазаланатын болады.

 

Мемлекет басшысы бірқатар орталық және жергілікті атқарушы органдардың қызметіндегі бойкүйездік пен сылбырлыққа назар аудартып, олардың жұмысындағы жүрдім-бардымшылықты атап көрсетті.

 

Президент сыбайлас жемқорлыққа қарсы күрес барлық мемлекеттік органдар жұмысының негізгі бір бағытына айналып, ол жұмыс үшін қатаң сұраныс болатынын мәлімдеді.

 

Министрліктер мен ведомстволардың басшыларына, облыстардың, Астана және Алматы қалаларының әкімдеріне сыбайлас жемқорлыққа қарсы жүргізіліп жатқан жұмыстар мен осы бағытта қабылданған шаралар туралы ақпаратты арнаулы топқа беріп тұру тапсырылды. Арнаулы топ өзінің отырыстарында жүйелі негізде олардың есептерін тыңдайтын болады.

 

Президент мемлекеттік сатып алулар, құқық қорғау құрылымдарының қызметін ұйымдық-штаттық қамтамасыз ету саласында, сондай-ақ сыбайлас жемқорлыққа қарсы сапалы сараптама жүргізу жөнінде қажетті заңнамалық және ұйымдық шараларды қабылдау туралы Қауіпсіздік Кеңесінің тапсырмаларын орындауға қатаң бақылауды қамтамасыз ету қажеттігіне назар аударды.

 

Экономикалық және сыбайлас жемқорлық қылмысқа қарсы күрес жөніндегі, Мемлекеттік қызмет істері жөніндегі агенттіктерге, Бас прокуратураға, Әділет, Сыртқы істер және Ішкі істер министрліктеріне және ҰҚК-ге сыбайлас жемқорлыққа қарсы күрес саласындағы халықаралық тәжірибені зерттеу, сыбайлас жемқорлыққа қарсы шетелдік заңнамаға талдау жүргізу тапсырылды.

 

Шетелдік инвесторлар кеңесінің тәжірибесі мен әлеуетін пайдалану ұсынылды.  
Мемлекет басшысы сыбайлас жемқорлыққа қарсы тұру жөнінде мақсатты, жоспарлы және жүйелі шаралар қабылдау қажеттігін атап көрсетіп, науқаншылдыққа жол бермеу туралы ескертті.

 

Тұтастай алғанда кеңесте белгіленген шаралар мемлекеттің қоғаммен бірлесе отырып, бұл саладағы ахуалды жақсы жағына қарай түбегейлі өзгертуге деген ұмтылысын көрсетеді, мұның өзі сыбайлас жемқорлыққа қарсы күрестің тиімді де мөлдір жүйесін құруға мүмкіндік береді.


Барлық жаңалықтар
 
Басқа жаңалықтар
Барлық жаңалықтар