Жаңалықтар

3 желтоқсан 2007
Мемлекет басшысы Нұрсұлтан Назарбаев Ақордада бірқатар жұмыс кездесулерін өткізді.

Астана қаласының әкімі Асқар Мамин Президентке елорданың әлеуметтік-экономикалық дамуы жөнінде баяндады.


Астананы көшіргеннен бергі 10 жыл ішінде негізгі қорға тартылған инвестиция көлемі 20 есеге ұлғайды. Ағымдағы жылдың қорытындысы бойынша оның көлемі 25 пайызға артып, 3,5 миллиард долларды құрамақ. Өнеркәсіп өнімінің көлемі өткен он жылда 15 есеге артты. Қаланың әлеуметтік-экономикалық дамуының басқа да индикаторлары бойынша көрсеткіштер осы деңгейде өсіп отыр.


– Біз Қазақстанда ірі мегаполис – экономиканың өсу нүктесін жасадық. Мұнда мол қаражат салынуда, оны тиімділікпен жұмсап, астананы салуды негізінен 2010 жылға қарай аяқтау керек. Әрине, қазір Астанада мемлекеттік қызмет пен сервистің шын мәніндегі жоғары елордалық деңгейін қалыптастыру мәселелерімен айналысу керек, – деді Президент Н.Назарбаев.


Мемлекет басшысы Қазақстанның ЕҚЫҰ-ға 2010 жылы төрағалық етуіне байланысты Астанада саммиттер өткізу кезеңінде Ұйымға қатысушы 56 елдің делегациясы орналасып, жұмыс істейтін ғимарат салу қажет екенін атап өтті.


Кездесу кезінде сондай-ақ көлік және энергия салаларындағы ірі инвестициялық жобалар қаралды.


– Мен Мемлекет басшысын Астанада тұрғын үй салу бағдарламасын, соның ішінде “Қолжетімді тұрғын үй” бағдарламасын іске асыру барысы туралы хабардар еттім. Сондай-ақ елорданың 10 жылдық мерейтойын өткізуге байланысты мәселелер талқыланды, – деді А.Мамин журналистерге арналған брифингте.


Әділет министрі Зағипа Балиева Мемлекет басшысының қабылдауында министрліктің “бір терезе” қағидаты бойынша жұмыс істейтін халыққа қызмет көрсету орталықтарын құру жөніндегі жұмысы туралы есеп берді.


Үстіміздегі жыл ішінде Қазақстанның барлық облыс және аудан орталықтарында 220 осындай орталық ашылған, ал 2008 жылдың аяғына дейін жалпы барлығы 418 ХҚО жұмыс істейтін болады. 2010 жылға қарай Қазақстанның барлық елді-мекендерінде “бір терезе” нүктелерін ашу жоспары бар, оларды жергілікті “Қазпошта” бөлімшелерінде орналастыру ұсынылады.


- Сыбайлас жемқорлыққа қарсы сараптама жөніндегі комиссия қызметінің мәселелері талқыланды. 2008 жылдан бастап барлық заң жобалары мен нормативтік-құқықтық кесімдер сыбайлас жемқорлыққа қарсы сараптамадан өтетін болады. Мемлекет басшысы заң шығарушылық жұмыстың сапасын арттыру міндетін қойды, – деді З.Балиева журналистерге арналған брифингте.


Барлық жаңалықтар
 
Басқа жаңалықтар
Барлық жаңалықтар