Жаңалықтар

4 шілде 2007
Мемлекет басшысы Нұрсұлтан Назарбаев бүгін Астанада Бейбітшілік пен келісім сарайында өткен «Нұр Отан» халықтық-демократиялық партиясының кезектен тыс ХІ съезінің жұмысына қатысты.

big-нуротан.jpg

big-нуротан2.jpg

 

Таңертең съезд жұмысы басталмастан бұрын Нұрсұлтан Назарбаев Парламент Сенатаның төрағасы Қасым-Жомарт Тоқаевқа, Премьер-Министрдің орынбасары – Экономика және бюджеттік жоспарлау министрі Аслан Мусинге, Мәдениет және ақпарат министрі Ермұхамет Ертісбаевқа, Алматы қаласының әкімі Иманғали Тасмағамбетовке, «Қазына» тұрақты даму қорының төрағасы Қайрат Келімбетовке, «Нұр Отан» халықтық-демократиялық партиясының орталық аппаратының басшысы Сергей Громовқа және Каспий құбырөткізу консорциумының директорлар кеңесінің мүшесі Алтай Тілеубердинге «Нұр Отан» халықтық-демократиялық партиясының партиялық билеттерін тапсырды.


Съезд жұмысы барысында елімізде жүргізіліп жатқан саяси реформаларға, алдағы Мәжіліске және жергілікті өкілетті органдарға депутаттар сайлауға қатысты бірқатар мәселелер қарастырылды.


- «Нұр Отан» халықтық-демократиялық партиясының бүгінгі кезектен тыс съезі жаңа саяси жағдайда өтіп отыр. Бұл еліміздің жалпы саяси жағдайы мен «Нұр Отан» партиясындағы маңызды өзгерістерге де қатысты.


Біздің партиямыз өзімен одақтас үш партияның ықпалдасып қосылуы есебінен өзінің қатарын толықтырып, бүгінде жалпыхалықтық күшке айналды. Бұл – шын мәніндегі халықтық партия. Ол өзінің іс-әрекетінің саяси салмағы мен ауқымының арқасында саяси жүйенің тірегіне, Қазақстандағы саяси үрдістерді тұрақтандырып тұратын факторға айналды, - деп атап өтті сөйлеген сөзінде Нұрсұлтан Назарбаев.


Президент «Нұр Отан» партиясы алдағы парламенттік сайлауда басқа партиялармен бірге ашық, әділ және бәсекеге қабілетті күресте жеңіске жетіп, халықтың басым бөлігінің қолдауына ие болатындығына сенетіндігін айтты.


- Мен, Мемлекет басшысы және Конституциямыздың кепілі ретінде алдағы сайлаудың тәуелсіз әрі әділ болуына және Парламентке халықтың нақты қолдауына ие партиялардың ғана өтуіне барлық жағдайды жасаймын, - деді Нұрсұлтан Назарбаев.

Президент барлық саяси партияларды саяси мәдениеттілік пен ұлағаттылық танытып, өздерінің жеке амбицияларын емес, халық мүддесін басшылыққа алуға шақырды.


- Нәтижесінде барлық партиялар еліміздің жаңа заманға жаңа деңгейде өтуі үшін бар күш-жігерлерін біріктірулері қажет. Бұл – барлық қазақстандықтардың мүддесі. «Нұр Отан» партиясы мен басқа да партиялар әлемдік қауымдастыққа әлеуметтік шиеленіссіз және саяси дағдарыссыз бәсекеге қабілетті сайлаудың Қазақстан үшін қалыпты жағдай екенін іс жүзінде дәлелдеулері қажет, - деп атап өтті Мемлекет басшысы.


Президент «Нұр Отан» партиясы өз сайлаушыларына білім беру, тұрғын үй, денсаулық сақтау, экология салалары бойынша, таза ауыз сумен қамтамасыз ету, елді мекендерге телефон желісін тарту мен газбен қамтамасыз етуге байланысты сенімді әлеуметтік бағдарламаларды ұсыну қажет екендігін айтты.


Атап айтқанда, мықты әлеуметтік кепілге ие өркендеген мемлекет құрудың мақсат-міндеттері жария етілген партияның тұғырнамасында мемлекетіміздің әрбір азаматы үшін алдымыздағы бес жылда еліміздің өмір сүру жағдайын жақсартуға бағытталған нақты қадамдар айқындалған. Жекелей алғанда, Ішкі жалпы өнімді халық санына орай 13 мың долларға жеткізу; халықтың орташа айлық кіріс көрсеткішін кем дегенде екі есеге өсіру; орташа зейнетақыны 2,5 есеге көбейту, осылайша орташа зейнетақы 26 мың теңгеге жетеді; мемлекеттік базалық зейнетақы мөлшерін ең төменгі күнкөріс деңгейінің 50 пайыздық деңгейіне жеткізу; мұғалімдердің, дәрігерлердің, басқа да бюджеттік салалардағы қызметкерлердің жалақыларын кем дегенде екі есеге өсіру; баланы күтуге байланысты төленетін жәрдемақыны кем дегенде 2,5 есеге өсіру, кем дегенде 200 балабақша, 250 мектеп, 50 кәсіптік-техникалық білім беру мекемелерін, 150 көппрофильді ауруханалар мен емханаларды, ауылдық жерлерде кем дегенде 300 дәрігерлік амбулаториялар салу. Бұдан басқа партияның сайлауалды бағдарламасында 5 жылдың ішінде 2,5 миллион қазақстандықтарды жаңа тұрғын үймен қамтамасыз ететін кем дегенде 50 миллион шаршы метр тұрғын үйды іске қосу; жыл сайын 100 мың жұмыс орнын ашу; халықаралық талаптарға жауап беретін мүгедектерді оңалтудың аймақтық орталықтарын ашу; Қазақстанның ауылдары мен елді мекендерін таза ауыз сумен, байланыспен, тамаша жолдармен және медициналық қызметпен қамтамасыз ету мәселелері де қамтылған.


- Экономиканың өсімін әрбір қазақстандық жете сезінуі қажет! Партияның барлық іс-әрекеті біздің көпұлтты халқымыздың мүдделерін жүзеге асыруға бағытталуы тиіс. Партияның барлық мүшелері ел азаматтарының сенімі - біздің басты саяси қорымыз екендігін есте сақтаулары қажет. Әрі біздің бар күш-жігеріміз сол сенімді ақтауға бағытталуы тиіс, - деп атап өтті Нұрсұлтан Назарбаев.


Съезд делегаттары «Нұр Отан» партиясының алдағы келешекке бағытталған басты міндеттерін талқылап, партия бағдарламасының жаңа редакциясын қабылдады, партия Жарлығына енгізілген өзгерістер мен толықтыруларды және Қазақстан Республикасының Парламенті Мәжілісіне сайланатын депутаттар кандидатураларының партиялық тізімін бекітті.


Партиялық тізімде Үкіметтің осы құрамындағы Премьер-Министрдің орынбасары – Экономика және бюджеттік жоспарлау министрі Аслан Мусин, Әділет министрі Зағипа Балиева, Мәдениет және ақпарат министрі Ермұхамет Ертісбаев, Еңбек және халықты әлеуметтік қорғау министрі Гүлжана Қарағұсова, Президент жанындағы отбасы және гендерлік саясат жөніндегі ұлттық комиссияның төрайымы Айткүл Самақова, үшінші шақырылымдағы Мәжілістің бірқатар депутаттары, соның ішінде үшінші шақырылымдағы Мәжілістің төрағасы Орал Мұхамеджанов, Шығыс Қазақстан облысының әкімі Жәнібек Кәрібжанов, Республикалық ғарыштық агенттіктің басшысы Талғат Мұсабаев, басқа да еліміздің 27 танымал азаматтары бар.


«Нұр Отан» партиясы төрағасының бірінші орынбасары болып Бақытжан Жұмағұлов, орынбасарлары болып Қайрат Келімбетов пен Сергей Громов тағайындалды.

Съезд жұмысын аяқтап тұрып, Президент бүгінгі қабылданған бағдарламаның алдағы сайлауда партияға табыстар әкелетін нық сайлауалды тұғырнама болатынын атап өтті және съезге қатысушыларды аймақтарда бағдарламаға түсініктеме беру бағытындағы жұмыстарды жақын уақытта бастауға шақырды.


Съезд жұмысына 340 делегат пен 600-ден астам шақырылған қонақтар қатысты. Олардың ішінде партияның «Жас Отан» жастар қанатының 200-ден астам өкілдері мен екі жүзге тарта аймақтық және республикалық бұқаралық ақпарат құралдарының өкілдері бар.


Мемлекет басшысының сөйлеген сөзінің мәтінін мына жерден қараңыздар.


Барлық жаңалықтар
 
Басқа жаңалықтар
Барлық жаңалықтар