Бөлімдер санаты

Жаңалықтар

1 қыркүйек 2010
Мемлекет басшысы Нұрсұлтан Назарбаев Қазақстан Республикасы Парламентінің төртінші шақырылымының төртінші сессиясын ашты және Сенат пен Мәжіліс депутаттарының алдында сөз сөйледі.

011

02

03

Президент үшінші сессия жұмысының қорытындылары заң шығармашылық қызметінің сапасы арта түскенін көрсететінін атап өтті.

- Еліміздің құқықтық базасы құқық қорғау органдарын реформалауға, қылмыспен және жемқорлықпен күресті күшейтуге бағытталған заңдармен нығайтылды. Қаржылық және экономикалық қатынастар, бюджеттік және тариф саясаты туралы, салық салу саласындағы нормалар жетілдірілді. Энергия үнемдеу және су ресурстарын ұтымды пайдалануды ынталандыру үшін заңнамалық негіз құрылды. Жаңа заңнаманың үлкен блогы азаматтардың жекелеген санатын қолдауға және тұрғындарды кепілді көлемді тегін медициналық көмекпен қамтамасыз етуге бағытталды, - деді Мемлекет басшысы.

Парламент Қазақстан қол қойған 35-тен астам халықаралық құжаттарды ратификациялады. Қазақстан, Ресей және Беларусь Кедендік одағының негізі қаланды. Үш елдің Бірыңғай экономикалық кеңістігін құруға жол ашып берген бірыңғай Кедендік кодекс және өзге де заңнамалық актілер қабылданды.

Президент депутаттарға сындарлы жұмыстары үшін алғысын айтты және өткен сессия барысында заң шығармашылықтағы басты міндет – 2020 жылға дейінгі Стартегиялық даму жоспары құқықтық қамтамасыз етілгенін  атап өтті. Рұқсат ететін жүйені жетілдіру, тексерілетін субъектілерге қойылатын талаптар, нормативтік құқықтық актілерді қабылдау саласындағы мемлекеттік органдардың құзыреті туралы заң жобалары еш тоқтаусыз қарауды талап етеді. Бизнестегі әкімшілік жүктемені төмендету керек, соның ішінде лицензия беру, сертификаттау және акредитациялауға рұқсаттамалық процедураны қысқарту қажет. Банктер қызметі мен қаржы ұйымдарының тәуекелдерді азайту бөлігін реттейтін заңға өзгерістер мен толықтырулар енгізу қажеттігі туындап отыр.

Алдағы кезеңде «Ғылым туралы» заңның жаңа редакциясын, «Индустриалды саясат туралы», «Мұнай өнімдерінің жекелеген түрлерін өндіруді және олардың айналымын мемлекеттік реттеу туралы», «Арнайы экономикалық аймақтар туралы» заң жобаларын қарау міндеті тұр. Шаруа (фермерлер) шаруашылығының қызметі туралы, электр энергиясы саласында еңбек ететін ұйымдар туралы заңнаманы жетілдіру қажет.

Президент 1-2 желтоқсанда Астанада ЕҚЫҰ-ға мүше елдер мемлекет басшыларының Саммиті өтетінін атап өтті. Қазақстанға ЕҚЫҰ-ға мүше елу бес елдің басшылары келеді.

- Мұндай деңгейде жаһандық форумды өткізу Қазақстанның әлемдегі беделін көтеріп қана қоймайды. Бұл еліміздің дамуына қарқын беріп, қазақстандықтардың бірлігі мен патриотизмін одан әрі нығайта түседі. Мен Саммитке әзірлік жөніндегі барлық мәселені шешеміз деп сенемін. Күллі әлемге қонақжайлығымызды, ашықтығымызды және жауапкершілігімізді танытатын боламыз, - деді Нұрсұлтан Назарбаев.

Президент сондай-ақ 2011 жылы Қазақстан Тәуелсіздіктің 20 жылдық мерекесін атап өтетініне назар аударды. Оны лайықты қарсы алу - әрбір қазақстандықтың партиоттық парызы!

- Миллиондаған азаматтардың өздерінің азаматтық белсенділігін көрсетуі, жаңа индустриалдық Қазақстанның құрылысына қатысуға ұмтылысы, іспен айналысуы, еліміздің дамуында өз орнын табуы маңызды. Таяу уақытта жаңа ірі өндірістер, жолдар, әлеуметтік нысандар іске қосылатын болады. Үкімет, жергілікті билік органдары жұмыс істеуге ынталы адамдардың барлығын, әсіресе жастарды, жұмыспен қамтамасыз етуге, мамандық алуларына көмектесуге ұмтылулары тиіс. Кішкене істер жайлы - әрбір қала мен ауылды, әрбір көше мен ауланы абаттандыру туралы ұмытуға болмайды. Әрбір елді мекен таза, әдемі, жақсы жөнделген, өмір сүру, жұмыс істеу және демалу үшін қолайлы болғаны жөн. Еліміздің мерейтойына әзірлік барысына миллиондаған азаматтардың нақ осы тұрғыдағы патриоттық қатысуы көрініс алуы тиіс. Қазақстан Тәуелсіздігіміздің үшінші онжылдығына лайықты кіруі үшін біз әлі де көп істерді атқаруымыз керек! – деп атап көрсетті Мемлекет басшысы.   

Президент сөзінің мәтінін мына жерден қараңыз. 


Барлық жаңалықтар
 
Басқа жаңалықтар
Барлық жаңалықтар